بنسليمان: سمير اليزيدي عامل عمالة الإقليم يصلي عيد الفطر فساحة مصلي قرب الملعب الحسنية بنسليمان وسط تنظيم محكم وحضور 25 ألف مصلي

توفيق مباشر

Almouaten 24 -المواطن 24

عرفت ساحة مصلي قرب ملعب حسنية بنسليمان بمدينة بنسليمان هاد الصباح أجواء روحانية زوينة، حيث توافد آلاف الناس مع الفجر باش يصلّيو صلاة العيد ديال 1446 هـ. وكان من بين الحاضرين عامل إقليم بنسليمان، سمير اليزيدي، لي صلّى مع عدد من المسؤولين، المنتخبين، وشخصيات مدنية وعسكرية

. التكبيرات دوّات فالساحة، وزادت الأجواء روحانية وخشوع، قبل ما يتقدّم الإمام ويصلي بالناس ركعتين ديال العيد. من بعد، دار خطبة ركّز فيها على قيم التسامح والتآخي، وذكّر الناس بضرورة إخراج زكاة الفطر قبل الصلاة باش يتعمّم الخير على المحتاجين. حضر فهاذ المناسبة رئيس المجلس العلمي، ومندوب وزارة الأوقاف، وعدد من المسؤولين المحليين لي شاركوا المواطنين فرحة العيد، فواحد الأجواء لي كتعكس الروابط القوية بين الساكنة والمسؤولين.

هاد العام، لأول مرة، تصلّات صلاة العيد فمصلي قرب ملعب حسنية بنسليمان، ولي لقات استحسان كبير من طرف الناس بسبب رحابة المكان وسهولة الوصول ليه. تكلف بتنظيم هاد المناسبة الباشا رئيس المنطقة الحضرية لمدينة بنسليمان ، ورجال السلطة المحلية للمقاطعات الحضرية بمدينة بنسليمان ، لي سهروا على النظام وضمان أجواء هادئة للصلاة.

رجال الأمن، قوات المساعدة وأعوان السلطة لعبوا دور كبير فتنظيم السير وتأمين الساحة، حيث داروا مجهود كبير باش كلشي يدوز فظروف مزيانة

. مع الحشود الكبيرة لي فاقت 25 ألف شخص، ما كانش التنظيم ساهل، ولكن بفضل التنسيق المحكم، دازت الأجواء فخشوع وطمأنينة، وكلشي كان مرتاح. من بعد الصلاة، بقى الناس كيسلّمو على بعضياتهم، والعامل تبادل التهاني مع المواطنين

متمنياً لهم عيد مبارك. فالأخير، رفعوا الحاضرين الدعاء لله سبحانه وتعالى باش يحفظ المغرب ويعمّ الخير والبركة على الأمة الإسلامية، كما دعوا لجلالة الملك محمد السادس نصره الله بالصحة والعافية وطول العمر.